Books

Muse is Jacques le Roux se derde roman.

Annalize Hills resenseer Muse soos volg : “Hierdie verhaal is ‘n woordkunswerk. Dit is duidelik dat daar sorgvuldig oorweging geskenk is aan die keuse van karakters, omgewing agtergrond en soveel meer. Die verhaal het ‘n sterk verteltrant en trek die leser binne-in elke intrige. Met fyn sinspeling en nuanses lok Le Roux die leser om dieper te lees en emosies te ervaar wat die karakters in hierdie verhaal suggereer. Die dialoog word goed benut om die konflik tussen die karakters te beklemtoon.Die verhaal is meesterlik geskryf en die skrywerbehou hierdeur die leser se aandag, skep goeie tweestryd en die ontknoping het ‘n interessante slot.”

In ñ Lesersindruk op Litnet skryf Louise Viljoen: “Ek het dit geniet om sielkundige Jacques le Roux se roman getiteld Muse te lees. Die hardebandliefdesverhaal van 159 bladsye ontgin swaargewigtemas soos, onder meer, die bagasie van skeefgeloopte verhoudings wat ’n mens soms vir jare nog saam met jou dra, die huiwering om wéér te probeer, die keuses, opofferinge en selfs obsessies binne verhoudings, die onvermydelike aftakeling wat ouderdom bring, asook siekte en die dood. Maar moenie dink hierdie boek is swaarmoedige leesstof nie. Trouens, dis ’n lieflike, teer en eg menslike verhaal met oorgenoeg diepte om geensins voorspelbaar te wees nie. Le Roux het Muse kort na sy ma se afsterwe in 2021 begin skryf, terwyl hy deur sy eie rouproses gewerk het. As sielkundige glo hy aan skryfterapie en pas dit graag in sy werk toe. Ek dink dit is ook waarom Muse my geval het, want ek het self onlangs my ma aan die dood afgestaan en is nog besig om deur die rou, smart en verlies te werk. Muse is ’n deernisvolle verhaal wat menslike gebreke uitlig, maar tog hoop voorhou.”